Te Kawanga Tapu o Nga Rongotoa.......... Maioha atu Nga Rongotoa E hari nei au i te koa Hanake nei he ata hou Kia anga whakarunga ai ki te tihi o Hikurangi, kia noho i te ata o Kokai maunga Kia rongo i te ripo o te awa o Hotohoto Kia piri ki te ha o Te Aitanga a Mate Haruru ana hoki te hinganga o nga kaihautu o taku waka, auahi ana taku raru e, No reira e nga mate takoto marie koutou ki te po . Haramai  tonu ra te manuhiri i runga i te upokohau i  te pamarangai  i  te puehutanga mai  o te aroha.   I te ata hapara i te toru tekau o nga ra o Mei i tu te kawanga tapu te tuwheratanga o te whare manaaki o te whare kai, Nga Rongotoa.  Na te mahi tahi, na te whakaaro tahi a nga taina me nga tuakana ka ea ka puawai tenei moemoea.  I haramai te tini me te mano ki te tautoko ki te hapai i tenei kaupapa ataahua.   I haramai hoki a Te Whanau a Apanui ki te tautoko ki te manaaki i te iwi kainga.  Na Mihihara Ngata raua ko Ema Te Kani i puare ta tatou whare.  Na Hohepa Te Rairi Ngarimu me ona kaimahi i hanga ta tatou whare hou.  Ko te wairua o te rangi he wairua harikoa a he whakawhanaungatanga mai i nga pipi tae noa ki nga pakeke.    I te Ra Tapu i tu te kai hapa me te iriiri i nga mokopuna hei whakakapi i ta tatou hui ataahua.    Anei etahi whakaahua mai i tenei hui.  Ko Nori Parata te kaitango whakaahua.